POVIJEST BOŽJAKOVINE I OKOLICE

PRILOG 6.

28.veljače 1783.

Grof Ivan Drašković donosi odredbe o čuvanju vlastelinskih šuma
i zamjeni tlake za naturalne daće

Perva zapoved

Pokehdob da moji drugari dosti ne mogu kotare i loze moje zadosta braniti, potrebno je i pravo jest, da im podložniki moji koji okol mojih loz stoje, ali ne takovi priliki pripretili bi se biti, vsigdar na pomoć dojdu kada bi se zvali po rečenih lugarih. Kojigodar mojih podložnikov lugaru na pomoć dojde, ter mu blaga ali ljude kvar meni čineći za popasti vu mojem kotaru pomore, on će težaka po tomu oslobađat ter otetoga blaga ali robe, ali derveta 5 od 100 dobička imati. Kojigodar mojih podložnikov od tugara zvan na pomoć došel ne bi, jednoga težaka za kaštigu dati, ter još i telovnu kaštigu terpeti bude moral. Kojigodar mojih podložnikov kojega mojih oficirov gospodarskih z kakvim obmititi i na kakov krivičen čin ganuti bi se podufal, ne samo on dar zgubi, nego meni tuliko težakov, kuliko puta dar rečeni 10 krajcarov iznositi bude, za kaštigu davati bude moral. Očituje se dalše mojim podložnikom da se svaki takve ciganije čuvati znal bude, jerbo oficiri moji mite primiti nesmeju i plaćjom mojom dok mene služili budu zadovoljni biti moraju.

Druga zapoved

Budući da vnogoteri mojih podložnikov prema velike tlake jako se tuže, po koja meni malo hasni više puta njima pak velika škoda pribiva, nakanil sem mojim podložnikom nacsiu dati, kak oni koji z velikom tlakom obterženi jesu, ter daleko mojih zemalj stoje, poleščicu za dobit, meni pako dužnu tlaku lahko nadomestiti mogu. Dopušćamo njima naimre da dužnu tlaku z takvim dugovanjem kakva najlakše pre mogu odkupe ovim načinom. Ja ću primiti od svakoga takvoga kmeta: vagan žita za težaka 8, kukuruze za 8, pšenice za 10, herži za 6, zobi za 4.5, kernjak za 8, vedro vina po 9, vu novcu po 9 krajcarov daću pako.

1. Da se to samo na daljne kmete kamo na Božjakovine iz Ježeva i Trebovca, koji bi z tulikom tlakom obterženi bili da njim prez svoga kvara velikoga obveršiti ne mogu, razumeva.

2. More se i od bližnjih onem dopustiti koji z velikom preveć tlakom oterženi jesu.

3. Kmeti dobrovoljno tu milošću prositi moraju, ter svigdar kad se z kojim takov contract načini sudec varmeđianski coram stati mora da se je dobrovoljno vučinilo. I zato na jedan put z više muži takov contract podpisati se mora.

4. Kmet koji takvoga contracta za oslobođenje tlake vučinil jest, nikako i pod nikakvim praetextom radi nje bantuvati se nesme.

5. Žitek ali oslobođenje ne vu napridak, nego na koncu leta z decimom pobirati se mora. Koga bi pako nesrića žitka i vina mentuvala bila, ja ću ga do drugoga leta počekati.

6. Ravno tak slobodno bude svakom kmetu koji zato prikladan bude ono od rečenih dugovanj obećati i dati kaj hoće i kaj zmore.

7. Zadnić, ov contract svako leto tak iz jedne kak iz druge stranke prod novim letom bude se mogal poseti ali ponoviti. Muži vendar za jedno ali za drugo do Andraševa oglasiti se pri provizoru moraju.

Vu Brezovici, 28. februaris 1783.