POVIJEST BOŽJAKOVINE I OKOLICE

PRILOG 5.

4. kolovoza 1714.

Grof Ivan Drašković izdaje upute "hofmaštru" Mihalju Merolu

INSTRUCTIA ILI RAZLUČENJE

postavljenoga našega domaćega Hofmaštra poštuvanoga Merol Mihalja polag koje i on vu svojoj službe i družina deržati se ima. Najpervo da i sam, i polag mogućnosti družinu, navlastito hajduke, kuhinjsku, i koji conventiae nemaju, k pobožnosti deržal bude. Kada meša, litanie ali koja druga pobožnost bi bila, ako drugač od poslov svojeh ostati budu mogli, navlastito po nedjeljah i svetkeh da k meše dojdu. Na poštenje, vurednost našu i vernost i vernu službu, tak po sebi, kak i po družine, nam i našemu hižnomu tovarušu i odvetku, pazil bude, da vu sakum prilikum verna služba i poštenje naše iskaže se. I zato pod oblast i zapoved njegovu daju se vsi, zvan onih koji k stolu sedaju ili jur pod drugoga directiu bi bili, navlastito sokač i kuhinjska družina, poharnik, hajduki, soboli, fistri i vsi koji prez conventiae vu dvoru jesu, kak tulikaj i vsa naša i slug našeh po štalah družina (ovi ništar manje vu štalu navadni, ako polag lovamešter bude, od njega kaštigovani budu, da bi pako on polag ne bil, ali kaštiguvati ne hotel, navlastito pako in flagranti) ravno tak, kak i drugi, pod njegovu zapoved — strah i kaštigu budu. I zato ovem za hranu, opravu, hitti pinsz i red nihov skerbil bude. I ovi ako kakovu tužbu i vu hrane, ili vu oprave, ili jeden suprot drugomu imel kaj bude, najpervo pri našem Hofmaštru tužbu vučini, kojemu ako zadovolščina od njega ne bude, k nam se vuteći imaju. Kak pako ima za hranu, opravu, hitt pinsz preskerbiti, polag druge naše zapovedi razumeti hoće. I kajti navlastito kuhinja, fistarnica pod njega zapoved i directiu bude, da vu snage i vu svojem redu kuhinja i fistarnica deržala se bude, veliku skerb i pasku imal bude. Veliku skerb i pasku imal bude, koliko najveć moguće, tresil se bude, da nikaj što se vu kuhinje pripravi, ili vu fistarnice peklo bude, nit što se vunuter zvunsku, nit što se vun iznese, prez njegovoga znanja naj ne bude. I zato vsu zvunsku družinu, koj vu kuhinju ali fistarnicu neslišaju, vu nutre terpeti nema. Navlastito pako na fistre veliku pasku, tak kuhinjsku, kak fistersku i ostale družime vu vinu, mesu, melje, kruhu, zverine i ostalem dugovanju oko imal bude, da jednako lepi kruh pekli budu. Tatbinu i nemarlivost, kako do seh dob vučinili jesu, kruto jako kaštiguval bude. Velku pasku bude imel da kakova karka, halabuka, krič, vika, svađa, glasno morguvanje, med družinom ne pripreti se. Koji kakvu tužbu imel bude, najpervo k njemu i pri njem naj se tuži. I nijeden sam sebi zadovolščinu ne sme vučiniti. Ako pako koteri kakovo goder morguvanje, halabuku, krič, ali viku izdignul bi, i najpervo za reči njegove maral ne bi, takvoga koj pomenši bude z palicom dobro izmeti, druge pako polag vurednosti vu arest i vu temnicu, do previđenja našega, postaviti bude znal. Navlastito pako za stol, hranu i piliš naš i naše družine skerbel se bude. Što vu saki dan ili tjeden deputatuma bude, znati hoće. Što iz višega potrebno mu bude ili z marofov ili z penezi pripraviti bude moral. Kada rovašniki što donesu, on pri tom biti mora. On tulikajše njim što iz višega deputatuma bi bilo, donesti zapovedati more. Koje on iz quietantiami ili ključarica iz rovaši quieterali budu. Melin tak belu, kak oboju družinsku, predi nego vu peć pojde, kuliko je moguće naj pregleda, da falingu da bi dobro ne bila pripravna, i kuliko jeden put iz nje pripraviti se more, drugi put tulikaj pripraviti ima, znati bude mogel. Vsaki dan, vu jutru i večer, pred nego obedt i večera pripravljala se bude, ima z sokačem i klučaricom skupa sastati se, što pripravno imaju previdivši polag vu vremena, i kad sami ali koga gosta mali budemo, obedt i večeru razlučiti. Kuliko pako kad sami budemo pripraviti se ime, iz druge naše dispositiae razmeti hoće. Kuliko je moguće, kad jestvine za nas i za družinu davale se vu kuhinje budu, polag stati ima, da snagu i redt koje odlučen sam videl bude. Kositer, kupfer da vu snage deržal se bude veliku skerb imal bude. Navlastito da zdile, tanjeri vu velike snage na stol dojdu pazil bude. Ako što iz pecila ali druge jestvine, prez falinge družinskoga reda spraviti se more, to nazlučiti i zapovedati ima. I zato da iz stola jestvine koje se jemlju, je raven, vu kuhinju odnesu i ne razvleku, pazil bude. Na vino tak naše i družinsko što se trošilo bude, skerb imal bude da vu snage i z redom za mas nosilo se bude. Družine pako polag danom po zvoncu znamenju delilo se bude. Ako kada koja družina navlastito povekši, ali pri oficirskom stolu, ali med vremenom, kakov extra napitek želeli bi, takovoga listor da navadu i s tem učine dopustiti im dati more. Ništar manje i takov extra napitek, kak tulikaj, ako koji zvunski dojde, vu diarium napisati se ima. Kojega diariuma vu sakom imanju marlivo veče puti čez tijeden pregledati ima, videvši je li redit i deputatum obderzava se. Koji videvši da polag reda diarium vu vinu, kruhu, zobi annorvan jest, takvoga podpisati ima. Koji od njega podpisan prez difficultaša od praefectuša prieman bude. Ako bi pako vu diariumu več napisano bilo, neg bi od družine prijeto bilo, takav podpisati se nema, nit se dijaku vu račun prijemalo bude. Ako vu diariumu videl bi da bi stera družina više svojega reda prijela što bila, takvu družinu, ali kaštigovati ili prevendu na toliko vreme, na kuliko iz više jest vuzel pritegnuti bude znal. Zato tulikajše dijaki, ključari, nil samo corespondentiu, nego i dispositiu njegovu obderžavali budu. S kojim oni praefectušu račun davati budu znali. On pako za svoje dane dispositae odgovor dati bude moral. Za opravu družinsku skerbil se bude, doklam što kerpati se more, da vu vremenu zakerpa. Kada se kaj krajalo bude, vsigdar polag biti mora, da i na krajanje i na kerpe pasku imal bude. Navlastito, da onu družinu koja conventiu nema, zaradt obuteli i oprave skerb imal bude, ar navadni jesu drugam davati, domom pošiljati. I listor da novo mali budu, za nje se ne skerbiti, da se videlo bude koji kuliko vremena, kakvu obutel, opravu nosil bude. Nit migdar nijednomu nove nima dati, doklem stare na pervo ne da. Koj ako kak godt obutel, opravu svoju rastepli bi, marlivo kaštigati ima. S tam pako obutel ili opravu, koju nazadt vuzame, ali popravivši menšem da, ali na podstavu drugem oberne. I zato vse kože, izvun zaječih, kakoti teleće, ovčinske i povekše marhe na rovaš porkulabu klenovničkom bude moral pošiljati, kaj pak za obutel preskerbiti se bude znal. Kakvi goder gosti došli bi, polag nihove vurednosti, vsakomu za odlučen kvarter i priliku njegove družine preskerbiti ima. I zato jednog zmed družine, naj odluče, koj vsigdar prihodnem i gostom služil bude. Navlastito takve družine da znal bude, koju družinu k sterovomu stolu odpeljati i večer za sveće i jutro za vodu i za ostala preskerbiti. On pako sam da se stanovito izverši skerb i pasku imel bude. Vsa koja se goder, odkud goder, ali kako goder, za hranu dopeljaju ali donesu, za vsa znati mora, da što, i šta vu kuhinje, pivnice potrošiti se znal bude. Na snagu, ni samo kuhinje, fistarnice, nego tulikaj našega stola, peharskega, dvorišča, oko imal bude. I da polag mogućnosti družina, navlastito koji liberiu imaju, zatepeni i zamačkani hodili ne budu. Oficerskomu stolu koji na stolnjak, taniere, nihovo vino i posudu skerb bude imal. Postaviti mora da sigdar vu jutro fistrom, družine kuhinske, ima zapovedati, skerb imati na ognje. A pako večer nigdar predi sam spat, doklam ognje vse ne pogase. Ima tulikajše ravno tak skerb na hintove, kuje, hame, koliju i ostala takova imati, da ko on sam kakvu falingu vidi, ali mu se od lovašmeštra ili sekermeštra pokaže, takva vu vremenu popraviti da. Od penez koji mu se na kakov goder strošek dadu, i koj dan, kaj potroši, račun od novca do novca bude moral. Na putu tak, kak i doma, za vsa skerbel bude, kuliko vsakojače družine vsaki dan vu dvoru imal bude, znati mora, da tak polag broja družine govedinu i ostala na kuhinju davati, kak tulikaj diaruma podpisavati i zarad litti pinsza redt svoj znati bude mogel. On ništar manje ud nikoga, nego samo od nas i od našega hižnoga tavaruša i od našega praefectuša dependentiu imal bude. Koja mi njemu zapovemo verno i prez nijednoga čavanja aliti izkazane nemogućnosti, učiniti ima. Ar ako i koja nemogućna bi bila, ona i z prilikum nam ali sam, ali po prefectušu pokaže. Nego vse zapovedi naše dobrovolno i marlivo, izkazanem hotenjem, prez kriča i velikoga serca, i družine vse vu činjenom razlogu, vučiniti mora. _{(Arhiv Hrvatske, Arhiv obitelji Drašković, Kut. 52, br. 243.)}