|
31.
svibnja 1673.
Komorski
administrator Grgur Pavešić izdaje upravitelju Božjakovine
Jantolu Funteku upute za vođenje gospodarstva
INSTRUCTIA
CESAROVE I KRALJEVE SVITLOSTI IMANIA BOŽIAKOVAČKOGA OFFICIALA KNEZA
FUNTEK JANTOLA
Ako
ravno od zdavnja vu časti marlivi budući, i razumen oficial, znal
bi prez instructiae vsa ona, koja se njegove časti dostoju, i mogal
opravljati, naimre takovu, koteri je od detinstva vu jednom imanju
služil i gospodarstvo obnašal, ne dvoim da bi i drugim tanača ne znal
dati, ništar manje vidil sam potriboču da s ovom prilikom popisanu
instructiu ima prijeti, polag koje se vsa navada i od zdavna praticira,
gospodarstva od sih dob s tim bolje bude znal ravnati, vsemu prigledati,
i prišestne račune bolšem razlogom razravnavati. I na to se opomina
n a j p e r v o, da na se poufanoga imania to je to Božjakovečkoga,
Šestinskoga, Zagrebačkoga i Lomničkoga, kotere luge i druge ostale
huste, polia, zemlje i njihove pravice, marlivu skerb nositi, da se
od ovih imanjih ništar ne otuđi, da nišče u tih imanjih zobstunia
ništar ne lada, i pod koi godar modus za se ne obraća, nego vsa onako,
i vu onakovom stališu neka obstoje i na stran Fiscuša nih Svitlosti
kako su godar za nigdašnjega groffa Zrini Petra bila. Ako bi pako
gde, i kaj najmanšega u pamet uzel, da bi kaj takovoga na nih Svitlosti
Fiscusa kvar bilo, to takovo taki meni na znanje neka da se, takovim
dugovanjem ili silam z nih Svitlosti i Plemenite Comore pomočjum bude
moglo resistirati i z pravicum orasačkom braniti. Kmete u nihovi pravici
neka derži i deržati vučini. Pravičnu tlaku neka s nimi obslužava,
vekšu pako (ako je moguće) neka ih ne terši. Na nje nek skerb nosi,
da na kojega drugoga Gospodina ili fiembera zemlju ne idu i ne skaču
i mladi detići vu takova mesta pres oglašenja i dopušćenja neka ne
idu. Vse rečene kmete zuproti vsim zuprotivnikom neka sćiti i brani.
Med njimi navadnu pravdu i pravicu (ne gledeć na persone ubogoga ali
bogatoga, priatela, ali nepriatela neka čini i obslužava. I kakove
tužbe i pregriške, i kak malo tak veliko dugovanje z pravdum neka
previgiva, vu koih ako bi se nih Svitlosti Fiskušu obterženje pravedno
ili convictia, ali kakov drugi birsag pripital, tako sam takovu convictiu
ili birsag neka taki executiu učini i proventuš ili prijetek neka
prime. Ako bi se pako takove konec taki ne mogal učiniti, nego bi
može biti na apelatiu pošla, takovu preda me neka dirigera. 3. Polag
novoga inventariuma na vsa vu njem popisana dugovanja, marofe, marhu
i meline tako neka pazi da od tih vu prišastnom vrimenu račun bude
mogal dati, kakti i od ovoga inventara do sih dob račune neka dokonča
i prišestne neka prične. 4. Kaštel i vu njem buduće hiže čiste neka
derži, od ognja neka marlivo čuva. Ravno tak na marofih na oganj neka
paze, dimnjake i druga takova nihova mesta neka sam gusto krat pogleda
i kadi bude potribno popravka. K tomu pojate, štale i vse okolu kaštela,
marofov i verte kako se dostoji vu dobrom redu i popravkeh neka derži
i deržati učini. Družinu tak vu kaštelu, kako na marofih, dobro neka
derži, koja plaću zasluži po vridnosti na vsaki misec neka im nihovu
plaću plati. Kola dobra neka derži, da zaradi zločeste zprave družina
zauman vrimema ne bude trošila. I što z rukama mogu načiniti, toga
naj sa pinezi ne kupuje. Od majarice vse maslo i sir na tar neka uzimlje,
ali tako da od vsake dojne krave petnaist funtov masla, 40 funtov
sira na račun neka uzme. Poklakam ako takovo razređenje ovde jošće
ni navadno i ni stanovito, zato ako drugo i ne more biti. Dvorski
neka sam pazi na majaricu, da od krav hasne lebud kamo ne troši, nego
vse vu kaštel nosi, koja pako napuni. Vu kaštelu pako obilnoga stola
ne derži i poklakam da je 8 person, kojim totu stol je odlučen (i
tako kada bi vsi nutri zakupa bili) na govedinu pako pinezi budu isti.
Zato k tomu gledeć tak naj troši da preveć ne bude, i vu prišastnom
vrimenu račun bude mogal dati. 5. Na njegovu milost se poufajuć šestinski
ladavci, koterim zvuna ova druga instructia ne bude, nego od ove dependiraju,
i što im njegova milost bude zapovidal to neka čine, ali tako da Radić
Blaž koteri je do sih dob dvorski bil, on od sih dob onde porkulab
bude, koteri na hiže, na pivnice, i na vina spunjavanje, i tulikajše
skerb bude imal, od kojega on račun bude daval. Tulikajše na vinograde
neka skerb nosi, da kada vu nih kakovi godar težaki budu, neka na
nje pazi, i njim palir bude, ravno tak na marof i na marofu buduće
težake. Kruh pako Štefan koji dvorski bude, i pod nim lugari, ribiči
brodari i vsi kmeti budu, koteri na vse ove tako neka pazi kako dobro
i človički bude, vu potribnih vrimenih knez Jantol neka pomore, i
tanača neka da, ako bude potriboća, neka je i kaštiga. A ovi vsi zgora
popisani od kneza Jantola dependirali budu, kako je i gori rečeno.
Ov isti Štefan Kruh vse pinezi dohočene i vinske šestinskoga i zagrebačkoga
imanja bude zbiral, kojega tak je triba naučiti, od vsakoga lagva,
od brodarov pako vsaki tajedan neka pinezi k sebi uzme, kotere verno
negove milosti knezu Jantolu donese i vu ruke da, na kotereh pinez
prijetija neka negova milost quietira. Lugari pako od vsih dob na
luge i huste bolje neka paze i nikomur nikaj prez cedule neka ne dadu
pod veliku kaštigu i železa na nog nošenja. Ribičem mogla bi se ovde
bolja hasen uzeti, na je je potribno pripravljati da vse kontinoma
love i ribe vse vu poltar nose. Polag toga njegova milost vse more
svojom metalostojum vu Zagrebu prodavati i na pinezi obračati. I pri
brodarih triba je skreb imati da od brodov pravični račun dadu, i
kako su prisegli sebi, niti za se nikaj nek ne jemlju i ne obraćaju.
Kotero ako bi negova milost vu pamet uzel, takvoga krivičnoga vu železa
neka okuje i na mestu njega drugoga neka najde i postavi. Šestinski
porkulab nit vu žitku niti vu vinu prez moje commissiae nikomu nikaj
naj ne da. Z vina navadne sovende, nadopunjavanje pako vin, na vsaki
tajedan na 20 vidar jeden polić ili pol ponta emgeduje mu se, da i
vina čista i puna bude deržal i onako račun s nih dati bude mogal.
6. Ovdi vu Božjakovini ravno tako njegova milost neka ne derži ključara,
nego diak na vse vino i žitak naj skerb nosi, na koje neka knez Jantol
tako neka pazi, da za njega ali njegovi nezmerni potrošak kvara ne
valuje, koteroga Fiscus bude čakal. Tako neka razmi i vsaki drugi
pod nim ofical i ovde tako ništar ravno tako prez moje naimre commisiae,
zvuna ordinira, nikomu ništar ne da, ar mu se to takovo vu račun ne
prima. Za vin dopunjavanja i ovde je ravno tako triba razumiti kako
i vu Šestinah. 7. Poklakam pako da vu ovum imanju najvekši dohodek
iz lugov more biti, zato nje neka vu dobrom redu derži. Vu onom vrimenu
kada je žira ali paše, nikome za obstunja naj ne engeduje pasti, nego
navadnu žirovinu i dohodek prez vsakoga engedovanja od vsakoga neka
vazme. Ravno tako vu šestinske gore i drugih ostalih hustah. Naimre
pako ovde vu Božjakovini tulikajše driva kore guljenje prekorupce
neka prepove, naimre sirovomu drivu koje se saludom rodi, kem guljenje
treba prepustiti. Nego što se more vu suhom drivu za pineze prodati,
to more vučiniti. Grabante i lugare neka vu strahu derži, da se po
nihovi nemarnosti hudobe i lenosti vu lugih i vu hustah kakova kvar
ne pripreti. I tulikajše ako na gospocku ztran od kakvoga godar driva
što posiče, ali od suhoga ali od lagodišnjega kamo kaj proda z pinezi
na takova vsa driva cedulu vazdar neka dava, i na potriboću kaštelsku
posičeno neka zapiše, da se bude znalo kaj je čez celo leto posičeno
driva. Ovako je ravno na šestinske gore potribno je paziti i skreb
nositi. Buduć pako da se Medvidske gore iz der hasen more imati, tako
neka vsako leto jesen pako vu zimi konči jedno dvisto vozov derva
učini nasiči i vu zagrebačke hiže dopeljati, kotera budu se onde mogla
prodati i na pinez obernuti. 8. Kerčmarenja vinstva tak vu Božjakovini,
kak vu šestinskom imanju i vu zagrebačkih oboih hižah marljivo vu
napridak neka jemlje i promovira, da vsakojačka vina čez leto opineziti
bude mogal. Vu zagrebačkih hižah seno, zob i drugi jeliš kakoti maslo,
sir, kopuni i druga k tomu spodobna dugovanja vazdar neka se prodaju
i preminjaju. I da vezdar njegovu dobru cenu na pinezi bude mogal
obernuti naj pazi. Ov da ravno tako na Božjakovini kaj na pinezi more
obernuti neka takaj ne zamudi, naimre prasce i druge fele marhu kako
najbolje bude znal. 9. Na ovdešnju maltu i šestinske brode marlivo
neka pazi i njihove dohotke na tijedne neka k sebi prijemlje, vsigdar
zapisavši kuliko i kaj je nuter prijel, da pri maltaru ili brodaru
pinezi ne zginu. Pravičnu maltu i brodovinu neka učini uzimati, više
ljudi ne pripravlja plaćati, a tulikajše pravičnoga dohotka nikomu
naj ne engeduje. Ako gdogodar bi bil koj bi dužan plaćati neka uzme
s njega ništar ne marajući za nikoje liste i pasuše, kotere nikoji
selmani kažu i produciraju. 10. Vu vsakojačke zemlje marofske neka
z dobrim modušem orje, gnoj na vsakojačke žitve pripravlja i da se
o žitvi bude vidila dobroga gospodara marlivost. Na takove pako zemle
kuliko i kakov žitak je posijan vazdar po sebi polag vere i pravice
neka zapiše. Žitve pako vazdar dobro za goda neka dokonča i na polju
do žitve od vsakoga kvara na kuliko je moguće neka obućva. Žitve pako
jur posete na vsakom štuku koliko kop jest zraslo pravično neka sam
prebroji i zapisati neka učini. Potlam pako kada se snopje vu kupe
bude metalo ravno tako onda zproti neka broji da vu vsaki kup rovaš
postavivši bude se znalo kuliko je u sakom kup. I od toga meni vazdar
extractus neka pošalje. Nadalje kada kakove kupe zmlati vazdar pri
mere sam neka bude nazoči i zmlaćeni žitak polag računa kupov neka
zapiše, meru jednaku i pravu deržeći. 11. Na sinokošah kuliko sena
priraste vsake sinokoške seno, to je to kuliko na vsakoj sena zraste
neka popiše. Pako od zelenoga sena tuliko naj odluči na marhu kuliko
bude spodobno, a drugo neka soseb spravi, tako da družina k njemu
ne bu hodila; potlam neka je proda. Poklakam pako da su kmeti domaći
i fiemberski po zimi dužni ztanovite quartire plaćati; zato i u tom
ziromahom ljudem polašćica i fiskusu hasen bude, neka knez Jantol
vsih onih kmetov tak domaćih kak fiemberskih sinokoše obajde i na
kuliko bi vsaki takov kmet koscev sinokoše imal, tako mestu onoga
kvartira neka da od vsakoga novac 6. Koteru conscriptiu meni kaj najberže
more neka pošalje. 12. Vinogradi budući retki nje kako je najbolje
moguće z dobrim delom neka pomore zasađenjem i gnojenjem. Naimre pako
vinograd koj se slama savezonoga marofa gnojem od sih dob onde marhu
braneć naj pomaže; to naime vu jesen i vu zimi more vučiniti. Obradtve
pako za goda pri vsakom vinogradu neka marlivo pazi na spravljenje
vina da se mošt lipo, marlivo i hasnovito vu nutar spravi i da vu
njem kakovo rasipavanje ne bude. Koje vrime zmirovuši lagve napunjene,
nje neka z fiziri, cedulae na nje postavivši i vu lajstrome neka zapiše,
koih pare da mi pošalje. Pod nijedan put pako domaćega vina med desetinsko
ne miša. Nego ako listor što na malom zaostalo, z koterim cel lagev
se mogal zapuniti. I onako puna vina neka da i izruči dijaku vu Šestinjah
pako Kadiću vu ruke. Za suđe pako neka za goda skerb uzme i na čakovačku
potriboću kaj najveće more načiniti neka načini i gore vu Čakovec
pošalje. Pako na ono kaj je tamo poslal quietantiu neka uzme da se
bude znalo kaj je tamo postal. 13. Vsake fele dežmu ili desetinu,
kakoti žitnu i devetinu, ravno tak onu kotera vu slami kako onu vu
zernju ljudi daju, vinsku takajše, kernjaka ili deseto svinče, i drobnišu
od pčelcev i drugu takovu dežmu, k tomu razumne, pravične i prišesne
ljudi na popisanje i prez pominkanja neka prijemlje, od koterega vsakoga
extractus vučinivši meni neka pošalje. 14. Kada bude čemu kakovu hasan
vidil, kakoti volov preminjenje, kozam, meda i drugim hasnovitim terštvom
nad tim neka bude, da na hasan oberne, kotera meni za vrimena i za
goda neka na glas da, kako i po takovih kuliko bude moguće Fiskusu
bude se mogla hasan vučiniti. Tako iz vina z prilikum vrimena ako
bi videl da bi se moglo draže prodavati, tako te hasni neka ne zamudi.
15. Meline neka derži vu dobri zpravi. Vu njih neka derži prišestne,
dobre i verne melinare. S nimi rovaš neka derži, da kuliko žitka pride
i odonud da bude znal. Kakovo je pako melinišće oberhe kaštela Božjakovine
za nje neka dobro premisli, i da se onde na Fiscusevu stran malin
načini. Nad tim neka bude, i ako bi pervo moguće ne bilo, vu prišastnu
zimu nekar mu se drivo posiče, da se o prišastnom protuljetju melin
bude mogal načiniti, kako i neću drugač da bi se vučinilo. Tulikajše
od sih dob nikomu listor za jednu brazdu kerčiti naj ne prepusti,
pod veliku kaštigu. Do sih dob pako učinjene kerče pravično i marlivo
neka vse popiše i meni ono pisanje neka pošalje. 16. Po svetkih dela
nikakovoga naj ne jemlje i nedele. Cirkve koim je Fiscus patronus
vu pervi dobri navadi i redu neka derži. Nje zevsum farom neka popravlja,
koji bi pako k tomu zuproti bili, ako bi i drugi čij kmet bil, na
takovo delo more se primorati. I plebanušem nihovu plaću po stari
navadi što bu vsakoga neka primora dati i platiti. 17. Jednum ričjum
vse marlivosti i napridka vu ničem njegova milost ne špara. Kajgoder
more naj i zamisliti, kaj bi na njih Svitlosti Fiscusa na hasan moglo
biti neka ne zamudi. Kada bi pako vustajal, onde neka mene obnajde,
komu vu vsem pomoći zagdašnja instructia budem. Kakoti velim da vu
Instructiu vsega ni moći postaviti, zato neka bude i neka se spomina
stoga, da vu sem nih Svitlosti hasen najpervo tira, kvarov se pako
neka haba i čuva i sebe tako pomaša kako se staroga, vernoga i verstnoga
i človičnoga ladavca dostoji. Za kotera vsa zahvalnost i od Plemenite
Comore bude imal. Za koju dobru, ufanu i hasnovitu službu bude ovu
na leto plaću imal: vu gotovih pinezih for. 50, sukna padovana lakat
7, lisičje kerzno herptovinu jednu, človičen stol, na dan jeden pint
vina, za kruh na misec poldrug vagan zmisi, na govedinu novac 10 na
tajedan. Tulikajše conventia njegovoga dijaka ovako je: na leto gotovih
pinez for. 15, širokoga sukna na opravu lakat 6, černo kerzno jedno,
na spravu oprave pinez for. 2, ordinara i prevende vina na dan pint
pol, na tajedan na govedinu novac 10, na misec zmisi vagan poldrugi.
Datum Bosiako, die ultima maii 1673. (Arhiv
Hrvatske, Neoregestrata acta, Dodatak "Zriniana", knj. 61, str. 97—108.)
|
