|
12.
ožujka 1661.
Grof
Petar Zrinski određuje kmetovima
Božjakovine feudalna podavanja
Mi
grof Zrinski Peter, vekivečni gospodin od Zrinja, cesarske i kralevske
Svetlosti comornik, tolnačnik i oberstar legradski vekivečni, Senja
grada i vse Primorske po Kraine veliki capitan, dajemo na znanje vsem
i vsakomu, kojem se pristoje ili kadi bi se potrebno, z ovem našem
pisanu svedoditi: kako mi imajući z našemi Božjakovečimi podložniki
nekoje discordie iliti nesloge zaradi dohotkov (od žitka, tlake i
kerjakov) nam pristojnih, dozvasmo je vu božjakovečki naš kaštel i
pogodiše se s nami ovim dole popisanim redum dobrovolno. Najpervo
da oni nam pokorni i dužni biti imaju klakum, vsaki onulikum, kulikum
se zemlje njegove pristoji i kulikum se do se dob pokorni bili, i
kuliko dan je koteri čez tiedan dužen služiti, s tulikum marhum na
vsaku oficialov naših zapoved, pošteno delo delati dužen bude. To
samo izlažemo, ako bi z ovoga kotara vu povoz im zapoved bila, onda
nego z jednem maršetum z vožnjem ili zahatim, ili tovornim izajti
budu slobodni. Drutakajše od pčelcev, da nam i našemu ostanku i doklam
god familia naša ovo imanje ladala bude, oni i nihov ostanek davati
pravično dužni budu. Tretić: vsaka takajše hiža annuatim kerjaka jednoga
a ne več, akoprem bi več ali menje imala od deset, davala bude. K
čemu i to neka im znamo bude, da stare navade, kakoti vu košnah naimre
i ostaleh nihoveh tegah i zakonih (koji suprot onoj pogodbi nisu)
obderžavati dužni budu. Što ako bi koj zmed nih ne obderžal, da glavom
i vsem što na zapada. Zato mi i naš ostanek vsakum gospodskum milošćum
imenuvanem podložnikom našem, nagjeni biti, i vu ovoj njihovoj pravici
obderžati hoćemo. Zverhu česa za vekšega veruvanja radi dasmo im ov
naš list rukum našum podpisan i navdnum pečatium zapečaćen. Datum
in castello nostro Bosiakovona, die 12. martii anno Domini 1661 Comes
Petrus a Zrin. (Arhiv Hrvatske, Zemljorasteretno
povjerenstvo, Consilium Locumtenentiale regium Hungaricum, Department
urbariale, series IV, grupa A, Fasc. 5, br. 19 prijepis iz 1744.)
|
